ඉහළ පෙළේ අල්ලස් විමර්ශනයකට අදාළව සමගි ජන බලවේගයේ සංවිධායක චරිත් අබේසිංහ අත්අඩංගුවට ගැනීමත් සමඟ, එම පක්ෂය තුළ පවතින ද්විත්ව ප්රමිතීන් පිළිබඳව බරපතල ගැටලු මතුකරමින් හිටපු සමගි ජන බලවේග සාමාජික රෙහාන් ජයවික්රම නව දේශපාලන කතිකාවතක් ඇති කර තිබේ.
X (ට්විටර්) සමාජ මාධ්ය ජාලයේ සටහනක් තබමින් රෙහාන් ජයවික්රම, මීට පෙර සමගි ජන බලවේගයේ පාර්ලිමේන්තු මන්ත්රී ඉරාන් වික්රමරත්න සම්බන්ධයෙන් ඇති වූ මතභේදාත්මක සිදුවීමක් සිහිපත් කර ඇත. එහිදී ක්රීඩා සංගමයක තනතුරක් දැරීම සදාචාරාත්මක නොවන බව පවසමින් ඔහුට එම තනතුරෙන් ඉල්ලා අස්වන ලෙස දැඩි බලපෑම් එල්ල විය.
එම සිදුවීම වත්මන් තත්ත්වය සමඟ සංසන්දනය කරමින් රෙහාන් ජයවික්රම ප්රශ්න කර සිටින්නේ, මෙවැනි බරපතල චෝදනා එල්ල වී ඇති වත්මන් අවස්ථාවේදී එවැනි ප්රමිතීන් ක්රියාත්මක නොවන්නේ මන්ද යන්නයි.
“ක්රීඩා සංගමයක තනතුරක් දැරීමේ සදාචාරාත්මක ගැටලුවක් මුල් කරගෙන ඉරාන් වික්රමරත්නව ඉල්ලා අස්වීමට තල්ලු කරනු ලැබුවා. නමුත් එක්සත් රාජධානියේ වරදකරුවන් වී, දැන් මෙරටදී බරපතල අල්ලස් චෝදනාවලට මුහුණ දී සිටින සමගි ජන බලවේගයේ ප්රභූවරුන්ට එවැනි ප්රමිතීන් අදාළ වන බවක් පෙනෙන්නට නැහැ,” යැයි ඔහු ප්රකාශ කර තිබේ.
රෙහාන් ජයවික්රමගේ මෙම ප්රකාශය, විපක්ෂ නායක සජිත් ප්රේමදාසගේ සමීපතමයකු මෙන්ම සමගි ජන බලවේගයේ ප්රමුඛ පෙළේ සංවිධායකවරයකු වන, මහාපරිමාණ මූල්ය ගනුදෙනු සම්බන්ධ අල්ලස් විමර්ශනයකට පැටලී දැනට අත්අඩංගුවේ පසුවන චරිත් අබේසිංහ ඉලක්ක කර ගනිමින් සෘජුවම කරන ලද්දක් බව පොදුවේ පිළිගැනේ.
හිටපු අධිකරණ අමාත්ය විජයදාස රාජපක්ෂගේ පුත් රකිත රාජපක්ෂ සහ චරිත් අබේසිංහ අත්අඩංගුවට ගැනීමේ පුවත තවදුරටත් මාධ්යවල ප්රධාන පුවතක්ව පවතින පසුබිමක, රෙහාන් ජයවික්රමගේ මෙම අදහස් දැක්වීම හේතුවෙන් පවතින දේශපාලන නොසන්සුන්කාරී තත්ත්වය තවදුරටත් උග්ර වී ඇත.
මෙම නඩුව ගොඩනැඟී ඇත්තේ ‘හරක් කටා’ නමින් හැඳින්වෙන සංවිධානාත්මක අපරාධ කල්ලි නායක නඳුන් චින්තක වෙනුවෙන් විශාල අල්ලස් මුදලක් ඉල්ලා සිටීමේ චෝදනාව පදනම් කර ගනිමිනි.
