ජ්‍යෙෂ්ඨ මාධ්‍යවේදීන් දෙදෙනෙකු වන පෝද්දල ජයන්ත සහ සනත් බාලසූරිය යන මහත්වරුන් සිය ෆේස්බුක් ගිණුම්වල පළ කළ ප්‍රකාශයක් සම්බන්ධයෙන් වහා පරීක්‍ෂණ වාර්තාවක් ඉදිරිපත් කරන ලෙස කොළඹ මහාධිකරණ විනිසුරු මංජුල තිලකරන්න මහතා අධිකරණ රෙජිස්ට්‍රාර්වරයාට නියෝග කර තිබෙනවා.
ඔහු මෙම නියෝගය කර ඇත්තේ, රෙජිස්ට්‍රාර්වරයා විසින් මේ සම්බන්ධයෙන් කළ ලිඛිත දැනුම් දීමකින් පසුවයි.
නාමල් රාජපක්ෂ මන්ත්‍රීවරයාට එරෙහිව මේ වන විට අධි චෝදනා ගොනුකර ඇති කුප්‍රකට ක්‍රිෂ් ගනුදෙනුව සම්බන්ධව මහාධිකරණ විනිසුරු මංජුල තිලකරන්න මහතා පිළිබඳව ජ්‍යෙෂ්ඨ මාධ්‍යවේදීන් දෙදෙනා මෙම ෆේස්බුක් සටහන තබා තිබෙනවා.
මහාධිකරණ රෙජිස්ට්‍රාරවරයා විනිසුරුවරයාට දැනුම් දී තිබුණේ, මෙම පළ කිරීම් අධිකරණයට කළ අපහාසයක් ලෙස තමන්ට හැඟෙන බවයි.
මේ අනුව රෙජිස්ට්‍රාරවරයා මහාධිකරණ විනිසුරුවරයාගෙන් මේ සඳහා සුදුසු නියෝගයක් ඉල්ලා තිබුණා.
එම ඉල්ලීමට ප්‍රතිචාර දක්වමින් මහාධිකරණ විනිසුරු මංජුල තිලකරන්න මහතා නියෝග කර ඇත්තේ, අදාළ ෆේස්බුක් සටහන් සමග වාර්තාවක් ඉදිරිපත් කරන ලෙසයි.
වාර්තාව නොපමාව ඉදිරිපත් කරන ලෙසත් ඉන්පසු මේ සම්බන්ධයෙන් සුදුසු නියෝගයක් ලබා දෙන බවත් විනිසුරුවරයා දැනුම්දී තිබෙනවා.
මහින්ද රාජපක්ෂ මහතා ජනාධිපතිවරයා ලෙස කටයුතු කළ කාලසීමාවේ පැහැරගෙන ගොස් සිදු කළ පහරදීම් වලින් පසුව ජ්‍යෙෂ්ඨ මාධ්‍යවේදී පෝද්දල ජයන්ත සහ සනත් බාලසූරිය යන මහත්වරුන් විදේශගතව වාසය කරනවා.