2025 වසරේ ජනවාරි මස සිට මේ දක්වා වෙඩි තැබීම් 13ක් වාර්තා වී ඇති අතර ඉන් වෙඩි තැබීම් 7ක්ම සංවිධානාත්මක අපරාධ කල්ලි විසින් සිදුකර තිබෙනවා.
මෙම වෙඩි තැබීම්වලින් පුද්ගලයන් 9 දෙනෙකු ජීවිතක්ෂයට පත්ව ඇති බවත් තවත් පුද්ගලයන් දෙදෙනෙකු තුවාල ලබා ඇති බවත් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග මහතා පවසනවා.
එමෙන් ම, මෙම කාලය තුළ වෙඩි තැබීම්වලට ආධාර අනුබල ලබා දීම සහ වෙඩික්කරුවන් ලෙස ක්‍රියාකළ පුද්ගලයන් 30 දෙනෙකු ද මේ වන විට අත්අඩංගුවට ගෙන තිබෙන බව පොලිස් මාධ්‍ය ප්‍රකාශකවරයා පවසනවා.
විමර්ශනවලදී අනාවරණය කරගත් තොරතුරු මත ටී. 56 ගිනි අවි 3ක්, පිස්තෝල අවි 5ක් සහ වෙඩි තැබීමට උපයෝගී කරගත් යතුරුපැදි 4ක් ද පොලිස් භාරයට ගෙන තිබෙනවා.
මෙම අපරාධවලට සම්බන්ධ පුද්ගලයන් විදෙස්ගතව සිටි නම් ඔවුන් මෙරටට ගෙන්වා ගැනීමටත් ඉතා නුදුරු කාලයකදී අපරාධ කර ඉන්දියාවේ සැඟව සිටින අපරාධකරුවන් කිහිපදෙනෙකු මෙරටට ගෙන ඒමට කටයුතු කරන බවත් පොලිස් මාධ්‍ය ප්‍රකාශකවරයා අවධාරණය කර සිටියා.
