ඇමති වසන්තගේ උපදේශකට මසකට ලක්ෂ දෙකහමාර ඉක්මවූ දීමනාවක්

ජනාධිපතිවරයාට, අග්‍රාමාත්‍යවරියට සහ කැබිනට් අමාත්‍යවරුන් හත් දෙනෙකුට සහාය වීම සඳහා රජය උපදේශකයන් 37 දෙනෙකු පත් කර තිබේ.

ඩිජිටල් ආර්ථික අමාත්‍යාංශය සඳහා උපදේශකයන් 10 දෙනෙකු ජනාධිපති අනුර කුමාර දිසානායක විසින්ද අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සඳහා උපදේශකයන් 14 දෙනෙකු අග්‍රාමාත්‍ය ආචාර්ය හරිනි අමරසූරිය විසින්ද පත්කර ඇත.

ජනාධිපතිවරයා සහ අග්‍රාමාත්‍යවරිය සඳහා පත්කර සිටින උපදේශකයන් ස්වේච්ඡාවෙන් සේවය කරන අතර රජයේ වැටුප් හෝ දීමනා ලබා නොගනී.

අග්‍රාමාත්‍යවරියගේ සියලුම උපදේශකයන් අධ්‍යාපන ක්ෂේත්‍රයේ විශේෂඥයන් වේ.

පරිසර අමාත්‍ය ධම්මික පටබැඳිගේ, වෙළඳ හා පාරිභෝගික කටයුතු අමාත්‍ය වසන්ත සමරසිංහ සහ පළාත් සභා අමාත්‍ය මහාචාර්ය චන්දන අබේරත්න සඳහා එක් උපදේශකයකු බැගින් පත් කර ඇත.

අමාත්‍ය සමරසිංහගේ උපදේශකවරයා මසකට රු. 227,695ක් උපයන අතර රු. 46,695ක ඉන්ධන දීමනාවක් සඳහා හිමිකම් ලබයි.

අමාත්‍ය පටබැඳිගේගේ උපදේශකවරයා මාසිකව රු. 213,635ක්, වාහනයක් සහ ඩීසල් සඳහා රු. 47,685ක් ලබාගනී.

අමාත්‍ය අබේරත්නගේ උපදේශක, හිටපු අමාත්‍යාංශ ලේකම් අශෝක පීරිස්, රු. 117,150ක්, ජීවන වියදම් දීමනාව ලෙස රු. 17,800ක් සහ ඉන්ධන සඳහා රු. 46,695ක් ලබාගනී.

විපක්ෂ මන්ත්‍රී දයාසිරි ජයසේකරගේ ප්‍රශ්නයකට පිළිතුරු වශයෙන් මෙම විස්තර පාර්ලිමේන්තුවට ලිඛිතව ඉදිරිපත් කර තිබිණි.

කර්මාන්ත අමාත්‍ය සුනිල් හඳුන්නෙත්ති සඳහා උපදේශකයන් තිදෙනෙකු, ප්‍රවාහන අමාත්‍ය බිමල් රත්නායක සඳහා උපදේශකයන් තිදෙනෙකු සහ විද්‍යා හා තාක්ෂණ අමාත්‍ය මහාචාර්ය ක්‍රිෂාන්ත අබේසේන සඳහා උපදේශකයන් දෙදෙනෙකු ඇතුළත් වේ.

මහජන ආරක්ෂක අමාත්‍ය ආනන්ද විජේපාල, කෘෂිකර්ම අමාත්‍ය කේ. ඩී. ලාල්කාන්ත, සඳහා එක් උපදේශකයකු බැගින් පත් කර ඇත.ඔවුන් සියලුදෙනාම වැටුප් නොලබා සේවය කරයි.