1989 වැල්වැටිතුරෙයි සංහාරයෙන් දිවි ගලවාගත් පුද්ගලයන් සහ ඔවුන්ගේ ඥාතීන්, වසර 36 කට පෙර ඉන්දියානු සාමසාධක හමුදාව විසින් සිදුකරන ලද සමූල ඝාතන සහ විනාශය සඳහා ඇමරිකානු ඩොලර් මිලියන 15 ක් (ආසන්න වශයෙන් රු. බිලියන 4.5 ක්) වන්දි ඉල්ලා ශ්රී ලංකා වන්දි කාර්යාලයට සවිස්තරාත්මක වන්දි ඉල්ලීමක් ඉදිරිපත් කර ඇත.
වැල්වැටිතුරෙයි පුරවැසි කමිටුව විසින් ගොනුකරන ලද මෙම ඉල්ලීම, විදේශීය හමුදාවක් විසින් ශ්රී ලංකා භූමියේ සිදුකරන ලද සමූහ ම්ලේච්ඡ ක්රියාවක් සඳහා වන්දි ඉල්ලා සිටින පළමු අවස්ථාවයි.
1989 අගෝස්තු 2 සිට 4 දක්වා දින තුනක් පුරා පැවැති නොසන්සුන්තාවයකින් අවම වශයෙන් සිවිල් වැසියන් 66 දෙනකු මියගොස් 34 දෙනෙකු තුවාල ලැබූ බව වාර්තා වේ.
ජීවිත හානිවලට අමතරව, නිවාස 123ක් සහ වෙළඳසැල් 43ක් විනාශ වූ අතර තවත් නිවාස 250 කට වැඩි සංඛ්යාවකට හානි සිදුවිය.
යාපනයේ වඩමාරච්චි මාධ්ය සමාජයේ පැවති ජනමාධ්ය හමුවකදී ඒ බව නිවේදනය කළ අතර, දිවි ගලවාගත් පුද්ගලයන් සහ වින්දිතයන්ගේ පවුල්වල සාමාජිකයෝ මියගිය පුද්ගලයන් සිහිපත් කිරීම සඳහා පහන් දල්වා මල් කළඹ තැබීමට එක්රැස් වූහ.
“අපරාධකරුවන් විදේශීය හමුදා භටයන් වුවද, මෙම කුරිරුකම් සිදු වූයේ ශ්රී ලංකාවේ ස්වෛරී භූමිය තුළයි, වින්දිතයන් ශ්රී ලාංකික පුරවැසියන් විය. ඒ අනුව, මෙම ඛේදවාචකයේදී පීඩාවට පත් වූ තමන්ගේම ජනතාව හඳුනාගැනීම, වන්දි ගෙවීම සහ යුක්තිය ඉටු කිරීම සඳහා ශ්රී ලංකා රජය පූර්ණ වගකීම දරයි,” යනුවෙන් පුරවැසි කමිටු නියෝජිත එන්. අනන්තරාජ් වන්දි ගෙවීමේ කාර්යාලයේ අධ්යක්ෂ ජනරාල් වෙත ලිපියක් යොමුකරමින් පවසා තිබේ.
ඔවුන් එම වන්දි ඉල්ලීමේ පිටපතක් සහ ඇසින් දුටු සාක්ෂි ඇතුළත් වාර්තාවක් ජනාධිපති නීතිඥ එම්.ඒ. සුමන්තිරන් වෙත ද භාර දී තිබේ.
