හිටපු පාර්ලිමේන්තු මන්ත්‍රී ඉරාන් වික්‍රමරත්න කොළඹ මහ නගර සභාවේ නගරාධිපති අපේක්ෂයා ලෙස ඉදිරිපත් වන්නේ නම් ඔහුට සහය ලබාදීමට විපක්ෂයේ පක්ෂ ගණනාවක් ම එකඟත්වය පළකර ඇතැයි වාර්තාවේ.
ඒ කෙසේවුවද කොළඹ මහ නගර සභාවේ සමගි ජන බලවේගයේ නගරාධිපති අපේක්ෂයා ලෙස ඉරාන් වික්‍රමරත්න ඉදිරිපත් වනු ඇතැයි මත පළවුවද ඔහු ඒ සඳහා අකමැත්ත පළකර ඇතැයි පැවසේ.
ඒ අනුව කොළඹ මහ නගර සභාවේ නගරාධිපති අපේක්ෂකයා ලෙස ප්‍රසිද්ධ මුස්ලිම් ජාතිකයකු සොයා ගැනීම සඳහා සමගි ජන බලවේගය සාකච්ඡාවල නිරත වෙමින් සිටින බව වැඩිදුරටත් වාර්තාවේ.
ඉරාන් වික්‍රමරත්නව කොළඹ මහ නගර සභාවේ නගරාධිපති අපේක්ෂකයා ලෙස තෝරාගෙන ඇති බව හා ඔහු විසින්ම එය ප්‍රකාශ කළ යුතු බව හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර ප්‍රකාශ කළ අතර ඒ සම්බන්ධයෙන් පළවූ පළමු අදහස එය විය.
කොළඹ මහ නගර සභාවේ නගරාධිපති අපේක්ෂිකාව ලෙස වායි කැලී බල්තසර් ජාතික ජන බලවේගය විසින් නම් කරනු ලැබූ අතර අවලංගු කරන ලද නාම යෝජනාවලදීද එම මහ නගර සභාව සඳහා ජාතික ජන බලවේගය නගරාධිපති අපේක්ෂිකාව ලෙස නම්කර තිබුනේ ඇයවයි.
මේ අතර එක්සත් ජාතික පක්ෂයද කොළඹ මහ නගර සභාවේ සිය නගරාධිපති අපේක්ෂිකාව ලෙස හිටපු නගරාධිපති රෝසි සේනානායක නම් කිරීමට තීරණය කර තිබේ.
අවසන් වරට 2018 වසරේ පැවති කොළඹ මහ නගර සභා මැතිවරණයේදී එක්සත් ජාතික පක්ෂය සභිකයින් 60ක් දිනා ගනිමින් එහි බලය තහවුරු කරගත් අතර ශ්‍රී ලංකා පොදුජන පෙරමුණ සභිකයින් 23ක් දිනා ගනිමින් දෙවන ස්ථානයට පත්විය. එක්සත් ජනතා නිදහස් සන්ධානය සභිකයින් 12ක් දිනා ගනිමින් තුන්වන ස්ථානයට පත්විය. මනෝ ගනේෂන් ගේ නායකත්වයෙන් යුත් එක්සත් ප්‍රගතිශීලි සන්ධානය සභිකයින් 10ක් දිනා ගනිමින් සිව්වන ස්ථානයට පත්විය.
ඊට අමතරව ජනතා විමුක්ති පෙරමුණට සභිකයින් 6ක් හිමිවූ අතර එක්සත් සාම සන්ධානයට සභිකයින් 2ක් හිමිවිය. එක්සත් ජාතික නිදහස් පෙරමුණ, යහපාලනය සඳහා ජාතික පෙරමුණ, ලංකා කම්කරු කොංග්‍රසය හා ශ්‍රී ලංකා ජාතික බලය යන පක්ෂවලට එක් සභික ධුරය බැගින් ද, ස්වාධීන කණ්ඩායමකට සභික ධුර 2ක්ද හිමිවිය.