පොලිස්පති දේශබන්දු තෙන්නකෝන් සැඟවී සිටින්නේ ලොකු දේශපාලනඥයෙකුගේ නිවසේ බවට තොරතුරු ඇතැයි හිටපු පාර්ලිමේන්තු මන්ත්‍රී රන්ජන් රාමනායක මහතා සඳහන් කරයි.
පොලිස්පතිවරයෙක් පොලිසියට බියේ සැඟවී සිටින්නේ ලංකා ඉතිහාසයේ ප්‍රථම වතාවට බවත් ඔහු පැවසීය.
ශානි අබේසේකර මහතා දක්ෂයෙක් නිසා සැඟවී සිටින පොලිස්පතිවරයා අල්ලා ගනු ඇති බවද ඒ මහතා කියා සිටියේය. ජනාධිපති අනුර කුමාර දිසානායක සහ හිටපු අමාත්‍ය ටිරාන් අලස් අතර ඇති වූ ගනුදෙනුවක් හේතුවෙන් හිටපු පොලිස්පති දේශබන්දු තෙන්නකෝන් අත්අඩංගුවට ගැනීම වළක්වා ඇති බවට හිටපු අමාත්‍ය පාඨලී චම්පික රණවක චෝදනා කළේය.
හෝමාගම පැවති රැස්වීමකදී ඔහු පැවසුවේ අනුර කුමාර ටිරාන් අලස් කුමන වංචා හෝ මිනීමැරුම් සිදු කළත් ඔහුට එරෙහිව කිසිදු පියවරක් නොගන්නා බවයි.
“දේශබන්දු අත්අඩංගුවට නොගන්නේ ඇයි? ටිරාන් අලස් ඔහු පිටුපස සිටිනවා. අනුර කුමාර ටිරාන් අලස් කුමන වංචා කළත්, සමහරවිට ඊ වීසා හෝ ඊ-පාස්පෝට් හෝ ඔහු ඕනෑම අපරාධයක් කළත් ඔහුට එරෙහිව කිසිදු පියවරක් ගන්නේ නෑ. ඒක තමයි ගනුදෙනුව” ඔහු පැවසීය. ක්‍රියාකාරී වරෙන්තුවක් තිබියදීත්, වැඩතහනමට ලක්කර ඇති පොලිස්පති දේශබන්දු තෙන්නකෝන් අධිකරණ කටයුතු මඟහැරීම දිගටම කරගෙන ගියහොත්, ඔහුගේ වත්කම් රාජසන්තක කිරීමට නීතිමය පියවර ගන්නා බවට මහජන ආරක්ෂක නියෝජ්‍ය අමාත්‍ය නීතිඥ සුනිල් වටගල අනතුරු අඟවයි.
මේ සම්බන්ධයෙන් අදහස් දක්වමින් නියෝජ්‍ය අමාත්‍යවරයා ප්‍රකාශ කළේ, ඊට අදාළ නීතිය ක්‍රියාත්මක කිරීමට බලධාරීන් සූදානම් බවයි.
අපරාධ නඩු විධාන සංග්‍රහයේ ප්‍රතිපාදන ඒ වෙනුවෙන් භාවිත කළ හැකි බව නියෝජ්‍ය ඇමැතිවරයා වැඩිදුරටත් සඳහන් කළේය.