සංශෝධිත එකතු කළ අගය මත බදු (VAT) ඉන්වොයිස් ආකෘතිය අනිවාර්යයෙන් ක්රියාත්මක කිරීමේ දිනය 2026 ඔක්තෝබර් 01 දක්වා දීර්ඝ කරමින් දේශීය ආදායම් දෙපාර්තමේන්තුව විසින් අතිවිශේෂ ගැසට් නිවේදනයක් නිකුත් කර තිබේ.
දේශීය ආදායම් කොමසාරිස් ජනරාල් රුක්දේවී ප්රනාන්දු ගේ අත්සනින් යුතුව නිකුත් කර ඇති මෙම නිවේදනය මගින්, නව බදු ඉන්වොයිස් ආකෘතියට අනුගත වීම සඳහා මෙරට ව්යාපාරික ප්රජාවට සහ බදු ලිපිගොනු පවත්වාගෙන යන පාර්ශ්වයන්ට තවත් මාස දෙකකට ආසන්න කාලයක් හිමිවේ.
2002 අංක 14 දරන එකතු කළ අගය මත බදු පනතේ 20 වැනි වගන්තිය යටතේ පැවරී ඇති බලතල ප්රකාරව, දේශීය ආදායම් කොමසාරිස් ජනරාල්වරිය විසින් 2026 අගෝස්තු 06 දිනැති අංක 2500/106 දරන අතිවිශේෂ ගැසට් නිවේදනය මගින් මෙම තීරණය නිල වශයෙන් ප්රකාශයට පත් කර ඇත.
මෙම නව නියෝගය මගින් සංශෝධනය වන්නේ, VAT ලියාපදිංචි පුද්ගලයින් විසින් නිකුත් කළ යුතු බදු ඉන්වොයිස්වල ආකෘතිය සහ පිරිවිතරයන් සම්බන්ධයෙන් 2026 මාර්තු 27 වැනි දින ප්රකාශයට පත් කරන ලද අංක 2481/22 දරන මුල් නිවේදනයයි. මුල් සැලසුමට අනුව මෙම නව ඉන්වොයිස් ආකෘතිය 2026 ජූලි 01 දින සිට අනිවාර්ය කිරීමට නියමිතව තිබුණි.
ඩිජිටල් බදු එකතු කිරීමේ ක්රියාවලිය විධිමත් කිරීම සහ බදු ජාලයේ විනිවිදභාවය ඉහළ නැංවීම අරමුණු කරගනිමින් හඳුන්වා දුන් මෙම නව ඉන්වොයිස් ආකෘතිය සඳහා ආයතනික මට්ටමින් මෘදුකාංග පද්ධති (Billing & ERP Systems) යාවත්කාලීන කරගැනීමට අවශ්ය බවට ව්යාපාරික අංශ පෙන්වා දී තිබිණි.
විශේෂයෙන් සුළු හා මධ්ය පරිමාණ ව්යාපාරිකයින්ට මෙන්ම ප්රධාන පෙළේ වෙළෙඳ සමාගම්වලටද තාක්ෂණික ගැළපීම් සහ කාර්ය මණ්ඩල පුහුණුව සම්පූර්ණ කරගැනීම සඳහා කාලය අවශ්ය වීම සැලකිල්ලට ගනිමින් මෙම සහන කාලය ලබාදී ඇති බව වාර්තා වේ.
නව එකතු කළ අගය මත බදු ඉන්වොයිස් ක්රමවේදය ඔස්සේ ව්යාජ ඉන්වොයිස් භාවිතය වැළැක්වීම, ගනුදෙනු තත්ය කාලීනව (Real-time) නිරීක්ෂණය කිරීමේ හැකියාව පුළුල් කිරීම සහ බදු කාන්දුවීම් අවම කරගැනීම රජයේ සහ බදු පරිපාලනයේ ප්රධාන අරමුණයි.
ඔක්තෝබර් 01 වැනිදා සිට ක්රියාත්මක වන පරිදි නියමිත පිරිවිතරයන්ට අනුකූලව තම ගිණුම්කරණ සහ බිල්පත් පද්ධති සකස් කරගන්නා ලෙස දේශීය ආදායම් දෙපාර්තමේන්තුව සියලුම VAT ලියාපදිංචි ව්යාපාරිකයන්ගෙන් ඉල්ලා සිටී.
