මෑත කාලයේ ආණ්ඩුවක් ප්‍රාග්ධන වියදම් ලෙස වෙන්කළ විශාලම මුදල වන රුපියල් බිලියන 1400කට ආසන්න මුදලක් මෙවර අයවැයෙන් සංවර්ධන කටයුතු සඳහා වෙන් කර තිබෙන බවත්, මෙම වසර අවසන් වීමට පෙර එම ප්‍රතිපාදන නිසි පරිදි වැයකරමින් අපේක්ෂිත ආර්ථික වර්ධන ඉලක්ක සපුරා ගැනීමට දායකවීම දේශපාලන අධිකාරියේ මෙන්ම රාජ්‍ය නිලධාරින්ගේද වගකීම බවත් ජනාධිපති අනුර කුමාර දිසානායක අවධාරණය කළේය.
දේශපාලන අධිකාරිය සහ රාජ්‍ය නිලධාරින් විසින් ගනු ලබන තීන්දූ තිරණවල වින්දිතයන් බවට පත්ව ඇත්තේ ඊට කිසිදු සම්බන්ධයක් නොමැති පොදු ජනතාව බව පෙන්වා දුන් ජනාධිපතිවරයා, තවදුරටත් ඊට ඉඩ නොතැබිය යුතු බවද අවධාරණය කළේය.
ජනාධිපති අනුර කුමාර දිසානායක මේ බව සඳහන් කළේ පැවති හම්බන්තොට දිස්ත්‍රික් විශේෂ සම්බන්ධීකරණ කමිටු රැස්වීමට සහභාගී වෙමිනි.
මේ වසරේ 5%ක ආර්ථික වර්ධන වේගයක් රජය අපේක්ෂා කරන බවත්, රාජ්‍ය ආයෝජන ඉහළ යාම ආර්ථික වර්ධනයට සැලකිය යුතු දායකත්වයක් ලබාදෙන බවත් පෙන්වා දුන් ජනාධිපතිවරයා, එයින් රටේ සංවර්ධන කාර්යය පණගැන්වීමට හැකියාව ලැබෙන බවද පෙන්වාදුන්නේය.
රජය වෙන්කර තිබෙන ප්‍රාග්ධන වියදම් නිසි පරිදි වැයකිරීමට අපොහොසත් වුවහොත් එම චක්‍රය බිඳවැටෙන බවත්, එබැවින් මෙම ප්‍රතිපාදන නිසිපරිදි වැයකිරීමට සියලුදෙනා කැපවිය යුතු බවත් ප්‍රකාශ කළ ජනාධිපති අනුර කුමාර දිසානායක, මීට පෙර ප්‍රාග්ධන වියදම් ලෙස වෙන්කළ ප්‍රතිපාදන, එම ප්‍රමාණයෙන්ම, නියමිත කාලවලදී නොලැබුණු ඉතිහාසයක් රටේ තිබූ බවද සිහිපත් කළේය.
2025 අයවැයෙන් අමාත්‍යාංශ, දෙපාර්තමේන්තු සහ ආයතන මට්ටමින් හම්බන්තොට දිස්ත්‍රික්කයේ සංවර්ධන ව්‍යාපෘති සඳහා වෙන් කර ඇති ප්‍රතිපාදන සහ ඒ යටතේ මෙතෙක් ආරම්භ කර ඇති ව්‍යාපෘතිවල ප්‍රගතිය මෙහිදී සමාලෝචනය කෙරිණි.
දකුණු පළාත් සංවර්ධන වැඩසටහන යටතේ මෙම වසරේ හම්බන්තොට දිස්ත්‍රික්කය සඳහා රුපියල් මිලියන 574ක් වෙන්කර ඇතත්, මේ දක්වා වියදම් කර ඇත්තේ ඉන් රුපියල් මිලියන 23ක් පමණ බවත්, එය ආසන්න වශයෙන් 4%ක ප්‍රගතියක් බවත් මෙහිදී අනාවරණය විය.
දිස්ත්‍රික්කයේ කෘෂිකර්ම, ධීවර, සෞඛ්‍ය, අධ්‍යාපන, ග්‍රාමීය මාර්ග සංවර්ධනය, ඉඩම්, වාරිමාර්ග යන ක්ෂේත්‍රවල මතුව ඇති ගැටලු සහ ඒවාට ලබා දිය හැකි විසඳුම් පිළිබඳවද සාකච්ඡා කෙරිණි.