පිලිපීනයේ දේශපාලනඥයින්, රාජ්ය නිලධාරීන් සහ ව්යාපාරිකයින් සම්බන්ධ වූ මහා පරිමාණ දූෂණ වංචාවකට එරෙහිව දහස් සංඛ්යාත ජනතාවක් ඊයේ මැනිලා අගනුවර කේන්ද්ර කරගනිමින් දැවැන්ත උද්ඝෝෂණ ව්යාපාරයක නිරතව සිටියේය.
විශේෂයෙන්ම ගංවතුර පාලන ව්යාපෘතිවලට අදාළව විශාල කොමිස් මුදල් දේශපාලකයින් සහ ඔවුන්ගේ හිතවතුන් සාක්කුවේ දමාගෙන ඇති මහජනතාව චෝදනා එල්ල කරති. මේ අනුව එරට මහජන අරමුදල් අවභාවිත කිරීම සම්බන්ධයෙන් පුළුල් ජනතා විරෝධයක් නිර්මාණය වී තිබේ.
මෙම විරෝධතාවල ප්රධාන අරමුණ වී ඇත්තේ වංචාවට සම්බන්ධ වූවන් වගවීමකට ලක්කර ඔවුන්ට එරෙහිව නීතිය ක්රියාත්මක කරන ලෙස රජයට බල කිරීමයි. ආපදා අවදානම ඉහළ ප්රජාවන්ට වෙන්කළ අරමුදල් දූෂිත ක්රියා හේතුවෙන් අහිමි වීම පිළිබඳව උද්ඝෝෂකයෝ සිය බලවත් විරෝධය පළ කරති. මැනිලා නුවර රිසාල් උද්යානය එඩ්සා හි පිහිටි ජනතා බල ස්මාරකය උද්ඝෝෂණවල ප්රධාන මධ්යස්ථාන බවට පත්ව ඇති අතර රට පුරා අනෙකුත් නගරවලද විරෝධතා ක්රියාත්මක වේ.
ඕනෑම ප්රචණ්ඩකාරී තත්වයක් වැළැක්වීම සඳහා පොලිසිය සහ හමුදාව සීරුවෙන් තබා ඇති බව විදෙස් මාධ්ය වාර්තා කරයි.
උද්ඝෝෂණ පැවැත්වෙන ප්රදේශ මගහරින ලෙස එක්සත් ජනපදය සහ ඕස්ට්රේලියාව සිය පුරවැසියන් සඳහා සංචාරක අවවාද නිකුත් කර තිබේ.
මෙම විරෝධතා දිනය, මීට වසර 53කට පෙර පිලිපීනයේ යුද නීතිය ප්රකාශයට පත්කළ දිනයට යෙදී තිබීමද සුවිශේෂී වන අතර එමගින් යුක්තිය සහ පාලනයේ විනිවිදභාවය සඳහා වන ඉල්ලීමට ඓතිහාසික සංකේතයක් එක්කර ඇත.
වංචාවට හවුල් වූ සියලු දෙනාට එරෙහිව නඩු පවරා දඬුවම් ලබා දිය යුතු බවත් අනාගතයේ මෙවැනි මහා පරිමාණ වංචා වැළැක්වීම සඳහා ශක්තිමත් දූෂණ විරෝධී ප්රතිසංස්කරණ හඳුන්වා දිය යුතු බවත් විරෝධතාකරුවන්ගේ මූලික ඉල්ලීම් අතර වේ.
ආපදා සහන සහ යටිතල පහසුකම් සඳහා වෙන් කෙරෙන අරමුදල් පරිහරණයේදී රජය පූර්ණ විනිවිදභාවයකින් කටයුතු කළ යුතු බවත් දූෂණය සහ අක්රමිකතා හේතුවෙන් පීඩාවට පත් ප්රජාවන්ට යුක්තිය ඉටුකළ යුතු බවත් ඔවුහු වැඩිදුරටත් අවධාරණය කරති.
